Il-Ħajja Sigrieta tan-Nanna Ġenoveffa

Ir-rumanz tant popolari ta’ Trevor Żahra jieħu ħajja ġdida fuq il-palk, b’adattament teatrali ta’ Marta Vella. Mill-manuskritt li sab in-neputi ta’ Ġenoveffa, jirriżulta li din in-nanna xejn ma kienet mara mansweta u ta’ subagħha f’ħalqha. Il-kitbiet tan-Nanna Ġenoveffa, xi drabi imqarbin, drabi oħra profondi, jikxfu karattru mimli passjoni u enerġija, b’għatx għall-ħajja li tisfida ż-żmien. Lanqas missierha, negozjant magħruf tad-drappijiet, ma seta’ jrażżanha; lanqas iz-zija Fawstina bil-qdusija kollha tagħha jew iz-zija Ġemma bil-pariri prattiċi tagħha. Zanzu biss kien jaf iħollha u jdewwibha. U mid-dehra, mhux biss Zanzu!

Produzzjoni ġdida, b’direzzjoni ta’ Toni Attard, mimlija umoriżmu, nostalġija u xewqat li se ddaħħlek fid-dinja sigrieta ta’ Nanna Ġenoveffa.